UFC rembist nú við að halda stórt bardagakvöld þann 9. maí. Bardagakvöldið á nú að vera í Flórída.
UFC 249 átti upphaflega að vera um síðustu helgi í New York. UFC 250 átti síðan að vera þann 9. maí í Brasilíu en vegna kórónaveirunnar hefur UFC þurft að hætta við eða fresta flest bardagakvöldin sín.
Ekki verður hætt við UFC 249 heldur verður það haldið þann 9. maí í Flórída samkvæmt MMA Fighting. Ríkisstjóri Flórída, Ron DeSantis, telur atvinnumannaíþróttir vera nauðsynlega þjónustu og er til í að leyfa slíka viðburði að fara fram án áhorfenda.
WWE fjölbragðaglíman hefur þegar fengið leyfa til að halda lokaðan viðburð. Boxsamband Flórída (sem hefur yfirumsjón með MMA viðburðum í ríkinu) er tilbúið að leyfa viðburðinum að fara fram svo lengi sem áhorfendum verði ekki hleypt inn. Sambandið hefur leyfði MMA viðburði að fara fram í mars í miðjum faraldrinum.
UFC 249 verður því á sínum stað þann 9. maí en þeir Tony Ferguson og Justin Gaethje eiga að mætast í aðalbardaga kvöldsins. Henry Cejudo mun síðan að öllum líkindum mæta Dominick Cruz um bantamvigtartitil UFC.
