Gunnar Nelson er kominn til Danmerkur þar sem bardagi hans við Gilbert Burns fer fram. Fyrsti þátturinn í videobloggi Mjölnis fyrir bardagann er kominn á sinn stað.
Gunnar Nelson átti langar æfingabúðir fyrir bardagann í Danmörku. Gunnar byrjaði æfingabúðirnar hér heima en fór svo til Írlands í rúman mánuð áður en hann kláraði æfingabúðirnar á Íslandi. Í þættinum er kíkt á bakvið tjöldin í æfingabúðunum síðustu vikurnar fyrir bardagann.
Gunnar fékk til sín „striking“ þjálfarann Jorge Blanco en sá hefur unnið með mönnum á borð við Georges St. Pierre, Rashad Evans, Michael Bisping og fleirum. Gunnar hefur lagt meiri áherslu á standandi viðureign fyrir þennan bardaga heldur en fyrir síðustu bardaga.
Gunnar hefur haldið áfram að vinna með Unnari Helgasyni fyrir styrktar- og þrekþjálfun sína en í upphafi æfingabúðanna var lögð aukin áhersla á styrk. Nánar má forvitnast um æfingabúðirnar frá Gunnari, Jorge og Unnari í The Grind.
