Þórhallur Ragnarsson hlaut tvöfalt gull á Danish Open í brasilísku jiu-jitsu í dag.
Þórhallur keppti fyrir hönd Mjölnis og vann -94 kg flokk karla í galla í flokki fjólublábeltinga í gær. Þórhallur þurfti bara að keppa eina glímu í sínum flokki og vann glímuna á hengingu með kraganum úr „crucifix“ stöðunni. Því miður tapaði Þórhallur svo fyrstu glímunni sinni í opna flokkinum á hengingu (bow and arrow).
Í dag fór svo nogi (án galla) hluti mótsins fram og má segja að það hafi verið endurtekið efni. Aftur tók Þórhallur gullið í sínum flokki (-91 kg) og mætti sama andstæðingi og í gær. Í þetta sinn vann Þórhallur á aukastigum (e. advantage). Þórhallur tapaði svo fyrstu glímunni sinni í opna flokkinum á stigum.
Halldór Logi Valsson úr Fenri keppir á Rome Open um þessar mundir og hlaut brons í sínum flokki og silfur í opna flokkinum í gi hluta mótsins í gær. Frábær árangur hjá honum en hann keppir í nogi hluta mótsins síðar í dag og greinum við nánar frá því þegar hann hefur lokið keppni í dag.
