Það verða þrír Íslendingar í eldlínunni á FightStar 14 bardagakvöldinu þann 14. apríl. Þeir Bjarki Ómarsson, Birgir Örn og Sigurjón Rúnar eru allir komnir með bardaga.
Bjarki Ómarsson (1-0 sem atvinnumaður) berst sinn 2. atvinnubardaga á kvöldinu en fyrsti atvinnubardagi hans fór fram á FightStar kvöldinu í desember. Þar sigraði hann Mehmosh Raza (5-1 sem atvinnumaður fyrir bardagann) eftir klofna dómaraákvörðun í frábærum bardaga.
Núna mætir Bjarki hinum breska Terry Doyle (4-5) en hann er öllu reyndari en Bjarki. Þetta verður áhugavert næsta skref hjá Bjarka en bardaginn fer fram í fjaðurvigt.
Birgir Örn Tómasson (2-0 sem atvinnumaður) er einnig kominn með bardaga en hann fær Stelios Theo í léttvigt. Þetta verður fyrsti atvinnubardagi Theo en hann var 4-1 sem áhugamaður og var léttvigtarmeistari áhugamanna í FightStar.
Sigurjón Rúnar Vikarsson (1-0 sem áhugamaður) fær áhugamannabardaga gegn Christian Knight. Þetta verður fyrsti MMA bardagi Knight en bardaginn fer fram í veltivigt.
Ekki er öll von úti að fleiri Íslendingar berjist þetta kvöld.
