Fyrrum veltivigtarmeistari UFC, Tyron Woodley, snýr aftur í búrið í London þann 21. mars. Woodley mætir þar bretanum Leon Edwards í aðalbardaga kvöldsins.
Woodley, sem er orðinn 37 ára, barðist síðast í mars 2019 þar sem hann tapaði veltivigtarbeltinu til Kamaru Usman. Þar leit Woodley vægast sagt ekki vel út og þarf því að eiga góðan bardaga til að geta átt möguleika á titlinum aftur.
Á sama tíma er Leon Edwards búinn að vera á siglingu í veltivigtinni og er búinn að vinna átta bardaga í röð, þar á meðal Gunnar Nelson. Edwards hefur verið að óska eftir tækifæri á því að berjast um veltivigtarbeltið eða stórum bardaga sem gulltryggði titilbardaga með sigri.
Þessir bardagamenn eru tveir af þeim betri í þyngdarflokknum og þetta er því frábær bardagi fyrir bardagakvöldið í London.
Dana White staðfesti bardagann við ESPN en samningar hafa þó ekki verið undirritaðir. Woodley hótaði á dögunum að hætta við bardagann eftir að Leon Edwards gerði grín að rappferli Woodley.
Woodley virðist hafa tekið gleði sína að nýju og verður bardaginn mikilvægur fyrir veltivigtina.
