UFC verður með bardagakvöld í Kaupmannahöfn í september. Þetta verður fyrsta heimsókn UFC til Danmerkur og gæti Gunnar Nelson barist þar.
UFC var með bardagakvöld í Stokkhólmi í gær en í útsendingunni í gær var það formlega tilkynnt að UFC muni halda bardagakvöld í Danmörku. Orðrómur um heimsókn UFC til Danmerkur hefur verið lengi á kreiki og var talið að UFC kæmi til Danmerkur árið 2017 en ekkert varð úr því.
Bardagakvöldið fer fram þann 28. september í Royal Arena í Kaupmannahöfn en miðasala hefst 21. júní.
Engir bardagar hafa verið tilkynntir á bardagakvöldið en líklega verða margir bardagamenn frá Norðurlöndum á bardagakvöldinu. Gunnar Nelson er talinn líklegur til að berjast þar en ekkert hefur verið staðfest þess efnis.
