Yoel Romero mætir Israel Adesanya á laugardaginn á UFC 248. Romero segist bara eiga um 6 kg eftir í niðurskurðinum.
Yoel Romero hefur átt í erfiðleikum með að ná vigt fyrir sína síðustu tvo titilbardaga. Romero þarf að vera 185 pund (83,9 kg) eða minna á föstudaginn þegar vigtunin fer fram. Í síðustu tveimur titilbardögum sínum hefur Romero verið 185,2 pund og 187,7 pund og gat því ekki unnið titilinn í þeim bardögum.
Núna segist Romero vera á undan áætlun í niðurskurðinum sínum. Í viðtali við Ariel Helwani kveðst Romero vera 198 pund (89,8 kg) – fjórum dögum fyrir vigtunina. Romero segist vanalega vera um 202 pund (91,6 kg) á mánudeginum fyrir bardagann.
UFC 248 fer fram á laugardaginn í Las Vegas.
