Svíinn Alexander Gustafsson mætir Glover Teixeira á UFC bardagakvöldinu í Stokkhólmi. Bardagakvöldið fer fram þann 28. maí og verður þetta aðalbardagi kvöldsins.
Þetta herma heimildir MMA Fighting og samkvæmt MMA Viking mun bardaginn verða staðfestur af UFC á þriðjudaginn. Alexander Gustafsson er stærsta MMA stjarna Svíþjóðar og kemur því ekki á óvart að hann skuli vera í aðalbardaganum.
Gustafsson hefur verið að glíma við bakmeiðsli og ekki barist síðan í september. Til stóð að Gustafsson myndi mæta Antonio ‘Lil Nog’ Nogueira í nóvember en Gustafsson neyddist til að draga sig úr bardaganum vegna meiðsla.
Glover Teixeira sigraði Jared Cannonier á UFC 208 fyrr í mánuðinum en þar áður var hann illa rotaður af Anthony Johnson.
Þetta er ekki í fyrsta sinn sem þeir Glover Teixeira og Alexander Gustafsson hafa átt að mætast en þeir áttu að mætast í júní 2015 áður en Gustafsson meiddist.
