Goðsögnin Anderson Silva kemur inn með aðeins tveggja daga fyrirvara og mætir Daniel Cormier á UFC 200. Silva kemur í stað Jon Jones eftir að Jones féll á lyfjaprófi.
Bardaginn fer fram í léttþungavigt en ekki er um titilbardaga að ræða. Cormier fær því að berjast eftir langan og strangan undirbúning þó hann hefði auðvitað kosið að mæta Jones frekar en Silva.
Anderson Silva er 41 árs og hefur ekki unnið bardaga (án þess að falla á lyfjaprófi) síðan í október 2012. Síðast tapaði hann fyrir Michael Bisping í London í febrúar. Silva átti að mæta Uriah Hall í maí en nokkrum dögum fyrir bardagann þurfti hann að fara í gallblöðruaðgerð. Hann kemur því inn í þennan bardaga með tveggja daga fyrirvara og nýbúinn að fara í aðgerð. Cormier er talsvert sigurstranglegri hjá veðbönkum en aldrei áður hefur Silva verið lítilmagni hjá veðbönkum á UFC ferli sínum.
Silva var nú þegar í Las Vegas (þar sem UFC 200 fer fram) þar sem hann átti að vera viðstaddur heiðursathöfn fyrir vin sinn Antonio ‘Big Nog’ Nogueira. Bardaginn verður þriðji síðasti bardagi kvöldsins en upphaflega átti bardagi Cormier og Jones að vera aðalbardaginn. Aðalbardaginn á UFC 200 núna er titilbardagi í bantamvigt kvenna á milli Miesha Tate og Amanda Nunes.
