Þeir Birgir Örn Tómasson, Egill Øydvin Hjördísarson og Diego Björn Valencia keppa á bardagakvöldi í Doncaster þann 28. mars. Birgir og Egill keppa í MMA en Diego í sparkboxi.
Birgir Örn (2-1) keppti síðast í Liverpool þann 7. mars og því skammt stórra högga á milli hjá honum. Birgir tapaði þá titilbardaga í léttvigt eftir fimm jafnar lotur en berst nú í veltivigt – þyngdarflokkinum fyrir ofan léttvigt. Hann mætir Onur Caglar (7-11) en Caglar æfir undir handleiðslu Danny Mitchell sem mætti Gunnari Nelson í ágúst 2010.
Egill Øydvin (2-0) mætir Matt Hodgson (3-1) í millivigt. Þetta er ekki í fyrsta sinn sem Hodgson mætir Íslendingi en Þórir Örn sigraði Hogdson í desember í fyrra.
Diego Björn Valencia mun berjast sparkbox bardaga undir áhugamanna K-1 reglum. Diego mætir Anthony Elliot (3-1) en þetta verður fyrsti sparkbox bardagi Diego. Diego hefur hefur barist fimm bardaga í MMA og keppti um árabil í karate.
