Bjarki Ómarsson átti að verja fjaðurvigtartitil sinn í Shinobi bardagasamtökunum nú á laugardaginn. Hann hefur nú þurft að draga sig úr bardaganum vegna meiðsla.
Bjarki (7-4) átti að mæta T.J. Nelson (4-1) á Shinobi 10 í Liverpool um helgina. Þetta átti að vera fyrsta titilvörn Bjarka en hann vann titilinn í lok júlí í fyrra.
Á þriðjudaginn síðasta meiddist Bjarki í hnénu og reyndist hann vera með rifu á liðþófa. Í dag, mánudag, var ákveðið að Bjarki myndi ekki keppa og eru þetta mikil vonbrigði fyrir Bjarka og sérstaklega á 22 ára afmælisdegi sínum. Bjarki ætlaði að keppa á Evrópumótinu í Prag síðasta nóvember en þurfti að draga sig úr keppni þá vegna meiðsla.
Þeir Birgir Örn Tómasson og Bjarki Pétursson keppa engu að síður á laugardaginn og mæta verðugum andstæðingum.
