VBC heldur sitt árlega Blábeltingamót í þriðja sinn á morgun, laugardaginn 23. febrúar. Keppt er í galla en mótið hefst kl. 11.
Mótið er sérstaklega hugsað fyrir þá sem eru með blátt belti í brasilísku jiu-jitsu en VBC er einnig árlega með mót sérstaklega fyrir hvítbeltinga. 39 keppendur eru skráðir til leiks í ár en keppt verður í átta þyngdarflokkum karla og tveimur þyngdarflokkum kvenna auk opinna flokka.
Áður en opnu flokkarnir hefjast verður skemmtileg sveitakeppni þar sem Draumalið Halldórs Loga mætir Þursaflokkinum. Draumalið Halldórs er skipað þeim Valdimari Torfasyni, Kristjáni Helga Hafliðasyni, Marek Bujło og Brynjari Erni Ellertssyni. Þursaflokkurinn er svo skipaður þeim Jóhanni Kristinssyni, Ými Vésteinssyni, Bjarna Kristjánssyni og Guðmundi Gunnarssyni. Í sveitakeppninni verður aðeins hægt að vinna með uppgjafartaki en glímurnar eru 4 mínútna langar. Ef hvorugur keppandi nær uppgjafartaki eru báðir úr leik. Ef keppandi nær uppgjafartaki heldur hann áfram og mætir næsta manni úr liðinu þangað til allir keppendur úr öðru hvoru liði eru úr leik. Ef hvort lið á aðeins einn keppanda eftir og glímu þeirra lýkur án uppgjafartaks, ræður dómaraúrskurður sigurvegaranum.
Dregið hefur verið í flokka en þá má sjá hér sem og nánari upplýsingar um viðburðinn.
