Cathal Pendred berst sinn annan UFC bardaga nú á laugardaginn er hann mætir Rússanum Gasan Umalatov í Stokkhólmi. Pendred ræddi við MMA Fréttir á fjölmiðladeginum á miðvikudaginn.
Cathal Pendred hefur oft æft í Mjölni enda æfir hann hjá John Kavanagh hjá SBG í Írlandi. Pendred sigraði sinn fyrsta UFC bardaga í Dublin í júlí þegar hann hengdi Mike King í 2. lotu eftir að hafa verið mjög vankaður í 1. lotu. Hann fékk í kjölfarið 60.000 dollara bónus fyrir frammistöðu sína og talaði um á blaðamannafundinum eftir bardagann að bónusinn gæti breytt lífi sínu. Aðspurður um hvernig bónusinn hafi breytt lífi sínu sagði Pendred að hann þyrfti ekki að hafa áhyggjur af peningum og væri ekki sífellt blankur.
