Dana White, forseti UFC, býst við að Conor McGregor muni verja fjaðurvigtarbeltið sitt næst eftir bardagann gegn Nate Diaz.
Þetta sagði hann í viðtali við heimasíðu UFC á dögunum. Þeir Conor McGregor og Nate Diaz mætast á UFC 202 eftir viku í veltivigtarslag. Conor mun því væntanlega mæta Jose Aldo aftur síðar á árinu.
„Ég býst við að Conor komi aftur niður og verji fjaðurvigtarbeltið sitt. Ég held að Nate vilji að bróðir sinn fái titilbardagann í veltivigt en Nick mun ekki fá titilbardaga umsvifalaust,“ sagði White.
Nick Diaz, eldri bróðir Nate, hefur nýlega afplánað 18 mánaða keppnisbann sitt og vill hann bara fá stóra bardaga. Tyron Woodley vann veltivigtartitilinn á UFC 201 á dögunum og óskaði strax eftir bardaga gegn Nick Diaz eða Georges St. Pierre. Miðað við ummæli White er ekki líklegt að honum verði að ósk sinni.
„Það eru aðrir sem eiga titilbardaga meira skilið [heldur en Nick Diaz]. Stephen ‘Wonderboy’ Thompson mun berjast um veltivigtartitilinn og svo sjáum við til hvað við gerum með Nick og Nate.“
Stephen Thompson hefur unnið sjö bardaga í röð í veltivigt UFC og er að flestra mati sá næsti í röðinni. Tyron Woodley var ekkert sérlega spenntur fyrir því að mæta Thompson þar sem hann vill fá stóra bardaga sem færa honum meiri tekjur en bardagi gegn Thompson myndi gera. Hann virtist einnig vera nokkuð hissa á ummælum Dana White enda hefur hann ekki skrifað undir neitt.
Funny how there is an official fight announced and I 1) Havent spoken to anyone 2) Agreed on opponent or date 3) Signed a bout agreement. ??
— Tyron T-Wood Woodley (@TWooodley) August 12, 2016
Það verður áhugavert að sjá hvernig veltivigtin mun spilast á næstu vikum en flestir hljóta að vera sammála Dana White hér. Conor McGregor verður að verja beltið sitt næst og Stephen Thompson á skilið að fá titilbardaga.
