Dana White, forseti UFC, sagði í samtali við TMZ í gær að Conor McGregor og Nate Diaz munu fá stórar sektir eftir atburði miðvikudagsins.
UFC hélt blaðamannafund fyrir UFC 202 og varð allt vitlaust. Conor McGregor mætti hálftíma of seint á blaðamannafundinn en skömmu eftir að hann mætti fóru þeir Conor og Nate Diaz í flöskukast sín á milli.
„Þeim verður refsað. Fólk verður að skilja að við heyrum undir íþróttasamband Nevada. Báðir eiga eftir að fá risastórar sektir og það verður líklegast réttað yfir þeim eftir bardagann. Við gætum fengið að sjá bönn og samfélagsþjónustu. Þetta verður ljótt,“ sagði Dana White.
White bætti við að einn einstaklingur hafi slasast í látunum og eiga þeir nú þegar von á lögsókn. White ítrekar að þetta hafi ekki verið ákveðið fyrirfram. „Þetta var 100% í alvöru. Það væri eitt það heimskulegasta í heimi að setja eitthvað svona upp á svona fjölmennum stað þar sem dósum og flöskum var kastað. Þetta mun kosta þá stórar fjárhæðir og verða mikill hausverkur og vesen. Þetta á eftir að valda þeim miklum óþægindum.“
