Dana White, forseti UFC, er svartsýnn á að bardagi Khabib Nurmagomedov og Tony Ferguson geti farið fram á þessu ári. Fimm sinnum hefur verið hætt við bardaga þeirra.
Þeir Khabib Nurmagomedov og Tony Ferguson áttu að mætast á UFC 249 þann 18. apríl en vegna kórónaveirunnar var hætt við bardagann. Khabib mun ekki berjast fyrr en í haust en Justin Gaethje kom inn í hans stað. Gaethje mætir Tony Ferguson þann 9. maí.
Dana White sat fyrir svörum á Reddit í vikunni. Þar var hann spurður hversu bjartsýnn hann væri að bardagi Khabib og Tony Ferguson gæti farið fram síðar á árinu.
Dana sagðist ekki vera bjartsýnn á að bardaginn gæti farið fram. Þá væri hann „hræddur um hvað gerist næst ef við reynum að bóka bardagann aftur.“
Ótrúleg óheppni hefur fylgt þessum bardaga en í þetta sinn var það heimsfaraldur sem kom í veg fyrir bardagann. Dana sagði einnig í þræðinum að sá bardagi sem hann langi mest að sjá aftur er viðureign Conor McGregor og Khabib.
Þráðurinn var hin besta skemmtun en svörin hans má lesa hér.
