Kórónaveiran hefur haft gríðarleg áhrif á íþróttaheiminn og fjöldi viðburða fallið niður. UFC ætlar að heimsækja Dublin í ágúst en gæti þurft að fresta bardagakvöldinu.
UFC tilkynnti fyrr á árinu bardagakvöld í Dublin þann 15. ágúst. Þetta verður fyrsta heimsókn UFC til Dublin síðan 2015 en nú gæti UFC þurft að fresta bardagakvöldinu vegna fjöldatakmarka á viðburðum í Dublin.
Yfirvöld í Írlandi hafa bannað viðburði með meira en 5.000 áhorfendur þar til í lok ágúst. UFC hefur ekki sent frá sér tilkynningu vegna bardagakvöldsins en 3Arena höllin tekur 9.500 manns í sæti. UFC gæti ákveðið að setja fjöldatakmark á bardagakvöldið eða fresta því þar til engar hömlur verði á fjölda áhorfenda í Dublin.
Enginn bardagi hefur verið staðfestur á bardagakvöldið en talið er að þeir Darren Till og Robert Whittaker verði í aðalbardaga kvöldsins. Gunnar Nelson verður mjög líklega á bardagakvöldinu en hann hefur ekki barist síðan í september 2019.
UFC hefur þurft að hætta við fjölmörg bardagakvöld vegna kórónaveirunnar og gæti bardagakvöldið í Dublin bæst í hópinn.
