Til stóð að Vitor Belfort myndi berjast sinn síðasta bardaga í UFC 212 nú um helgina. Eins og staðan er núna er Belfort ekkert á því að hætta.
Vitor Belfort barðist síðast við Kelvin Gastelum í mars. Eftir bardagann sagðist hann eiga einn bardaga eftir á samningnum og sá bardagi yrði hans síðasti í UFC. Talið var að bardaginn gegn Nate Marquardt um helgina yrði því hans síðasti í UFC en núna hefur hann hins vegar sagt að svo sé ekki.
Vitor Belfort á víst tvo bardaga eftir á samningnum en hann langar að berjast enn lengur en það. Fyrir þennan bardaga hefur Belfort æft hjá Firas Zahabi í Tristar í Kanada og segist hann geta barist fimm bardaga í viðbót.
„Ég held að þetta séu ekki endalokin. Það væri í lagi ef þetta væri minn síðasti bardagi en mér líður eins og þetta sé nýtt upphaf. Mér finnst eins og þetta sé upphafið á fleiri bardögum í UFC,“ sagði Belfort við ESPN.
Hann hefur ennþá mikla ástríðu fyrir MMA og er ennþá með þennan eldmóð sem þarf til að keppa. Hann er því ekkert á leiðinni að hætta eins og talið var en Belfort varð fertugur í apríl.
Belfort spjallaði við MMA Junkie um framtíðina en hann hefur mikinn áhuga á að vinna með UFC í framtíðinni eftir að hann leggur hanskana á hilluna. Belfort telur sig hafa eitthvað fram að færa til að gera UFC ennþá stærra.
Viðtalið við Belfort með risa sólgleraugu má sjá hér að neðan.
