Frankie Edgar er kominn með sinn næsta bardaga og það í nýjum þyngdarflokki. Edgar mætir þá Cory Sandhagen í janúar.
Frankie Edgar berst í sínum þriðja þyngdarflokki í UFC næst þegar hann stígur í búrið. Edgar byrjaði ferilinn sinn í léttvigt (155 pund) og hefur verið í fjaðurvigt (145 pund) undanfarin ár. Nú fer hann niður í 135 punda bantamvigt í fyrsta sinn.
Edgar mætir þá Cory Sandhagen á UFC bardagakvöldinu í Raleigh í Norður-Karólínu þann 25. janúar 2020. Bardaginn verður næstsíðasti bardagi kvöldsins.
Sandhagen hefur verið að gera það gott á síðustu árum en hann hefur unnið alla fimm bardaga sína í UFC. Sandhagen hefur unnið menn á borð við John Lineker og Raphael Assuncao en hann situr nú í 3. sæti styrkleikalistans í bantamvigtinni.
Frankie Edgar mætti Max Holloway á UFC 241 í sumar. Edgar tapaði fyrir Holloway í hans fjórða titilbardaga síðan hann tapaði léttvigtarbeltinu. Eftir tapið gegn Holloway lýsti hann því yfir að hann vilji fara niður í bantamvigt. Edgar var þó orðaður við bardaga við Conor McGregor en þegar ekkert varð úr þeim bardaga var bantamvigtin næst á dagskrá.
