Nick Diaz sigraði Takanori Gomi með afar óvenjulegu uppgjafartaki árið 2007. Eftir bardagann féll Diaz á lyfjaprófi og er talið að hann hafi verið undir áhrifum marijúana í bardaganum.
Nick Diaz hefur þrisvar fallið á lyfjaprófi vegna marijúana reykinga. Fyrsta brotið átti sér stað í Pride árið 2007 eftir bardagann gegn Gomi. Diaz sigraði þá Gomi eftir „gogoplata“ hengingu í 2. lotu. Þetta er líklegast eini sigurinn í sögu MMA eftir þessa sjaldséðu hengingu.
Bardaginn var hins vegar dæmdur ógildur þar sem Diaz féll á lyfjaprófi eftir bardagann. Íþróttasamband Nevada mat það sem svo að Diaz hafi verið undir áhrifum marijúana í bardaganum. Svo hátt var magn THC í þvagprufu hans.
Læknirinn Tony Alamo var í stjórn íþróttasambands Nevada á þessum tíma: „Þetta er einstakt tilvik. Ég var á bardaganum og ég tel að þú [Diaz] hafir verið undir áhrifum í bardaganum… það hafi gert þig dofinn fyrir sársauka. Hjálpaði það þér að vinna? Ég held það.“
Diaz var í síðustu viku settur í fimm ára keppnisbann eftir að hann féll á lyfjaprófi í þriðja sinn. Bannið þykir umdeilt og mun Diaz og lögfræðingur hans áfrýja banninu.
Hér að neðan má sjá sigur Diaz eftir „gogoplata“ uppgjafartakið.
