Glover Teixeira var greindur með kórónuveiruna á dögunum. Teixeira átti að mæta Thiago Santos síðar í september en bardaganum hefur verið frestað.
Bardagi Glover Teixeira og Thiago Santos er mikilvægur fyrir léttþungavigtina. Nú þegar Jon Jones er horfinn á braut úr léttþungavigtinni er þyngdarflokkurinn galopinn. Sigurvegarinn hér fær sennilega næsta titilbardaga.
Bardaginn átti upphaflega að vera aðalbardaginn á UFC bardagakvöldinu þann 12. september. Vegna smits Teixeira hefur bardaganum verið frestað til 3. október. Bardaginn verður ekki aðalbardaginn þá og því aðeins þriggja lotu bardagi.
Bardaginn fer því fram viku eftir að nýr meistari verður krýndur en þeir Dominick Reyes og Jan Blachowicz mætast á UFC 253 þann 26. september.
