Nýr styrkleikalisti UFC var birtur fyrr í kvöld þar sem okkar maður fór úr 13. sæti yfir í 12. sæti. Conor McGregor hækkaði um tvö sæti og kemst á topp 10.
Styrkleikalisti UFC er uppfærður rúmlega 36 klukkustundum eftir hvern viðburð. Listinn er valinn af fjölmiðlafólki sem setja saman sinn lista yfir topp 15 keppendur í hverjum þyngdarflokki fyrir sig. Meistarinn í hverjum flokki er ekki á listanum heldur einfaldlega skráður sem meistari þannig að það má í raun segja að listinn samanstandi af topp 15 áskorendum í hverjum flokki.
Að þessu sinni hefur Gunnar Nelson hækkað um eitt sæti á styrkleikalista UFC í veltivigtinni og er nú í 12. sæti. Hann fer upp fyrir Mike Pyle en þeir áttu að berjast í maí í fyrra áður en Gunnar meiddist. Þetta er eina breytingin í veltivigtinni eftir helgina.
Conor McGregor hækkar um tvö sæti og er nú í 10. sæti og fer upp fyrir Jeremy Stephens og Dennis Bermudez. Allt bendir til þess að McGregor mæti Dustin Poirier seinna á þessu ári en hann er í 6. sæti í fjaðurvigtinni.
