BJJ Globetrotters er með æfingabúðir á Íslandi um þessar mundir. Hátt í 200 erlendir glímumenn- og konur koma sérstaklega hingað til lands til að taka þátt í æfingabúðunum.
BJJ Globetrotters er með æfingabúðir um allan heim og er þetta annað árið í röð sem þeir heimsækja Ísland. Í bæði skiptin hafa æfingabúðirnar verið haldnar í Mjölni. Æfingabúðirnar byrjuðu á mánudaginn og klárast á laugardaginn.
Á æfingabúðunum er kennsla nánast allan daginn og um 12 tímar á dag kenndir af mismunandi þjálfurum. Í æfingabúðunum í ár eru 17 svartbeltingar í brasilísku jiu-jitsu sem kenna – þar á meðal nokkrir íslenskir þjálfarar.
Hópurinn sem sækir æfingabúðirnar er fjölbreyttur en fæstir eru atvinnumenn í íþróttinni og eru æfingabúðirnar frekar miðaðar að BJJ iðkendum sem stunda íþróttina sér til gamans.
