Næsti bardagi Conor McGregor mun vera titilbardagi í léttvigtinni. Þetta segir John Kavanagh í nýjasta pistli sínum.
John Kavanagh er yfirþjálfari Conor McGregor og Gunnars Nelson en hann skrifar reglulega pistla fyrir írsku heimasíðuna The 42. Í nýjasta pistlinum fer hann yfir síðustu daga eftir sigur McGregor á Jose Aldo á UFC 194. Það athyglisverðasta við pistilinn er þegar hann talar um hvað sé næst fyrir McGregor.
„Hvað er næst hjá Conor? Léttvigtarbeltið. Við ætlum að taka okkur smá pásu frá niðurskurðinum í 145 pundin þrátt fyrir að sá síðasti hafi verið sá auðveldasti. Næsta skref er að vinna léttvigtartitilinn. Núverandi meistari, Rafael dos Anjos mætir Donald Cerrone annað kvöld [bardaginn var í gær] og höfum við fengið grænt ljós á að mæta sigurvegaranum. Bardaginn mun líklegast fara fram í apríl,“ segir John Kavanagh.
Léttvigtarmeistarinn Rafael dos Anjos sigraði Donald Cerrone með tæknilegu rothöggi í gær eftir aðeins 66 sekúndur. Þetta var fyrsta titilvörn hans og bauð hann McGregor velkominn í léttvigtina eftir bardagann.
„Það væri í fínu lagi ef Frankie Edgar vill fá sitt tækifæri á fjaðurvigtartitlinum eða Aldo vill annað tækifæri gegn Conor. En þeir þurfa að bíða þar sem léttvigtarbeltið er næst á dagskrá,“ sagði Kavanagh enn fremur.
Ekkert hefur þó verið staðfest af hálfu UFC varðandi næsta bardaga McGregor.
