Fimm íslenskar stelpur kepptu á Golden Girl Championship boxmótinu í Svíþjóð um helgina. Kara Guðmundsdóttir tók gull í sínum flokki eftir þrjá bardaga.
Golden Girl Championship er aðeins fyrir konur og er þetta eitt stærsta kvenboxmót í heiminum með 368 keppendur frá 32 löndum. Keppt er í ólympískum hnefaleikum og stóð mótið yfir þrjá daga.
Fimm íslenskar stelpur kepptu á mótinu. Kara Guðmundsdóttir (HR/Mjölnir) Kristín Sif Björgvinsdóttir (HR/Mjölnir), Hildur Indriðadóttir (HFR), Margrét Guðrún Svavarsdóttir (HFR) og Kara Sif Valgarðsdóttir (HFR).
Á föstudeginum börðust þær Kara og Hildur sína fyrstu bardaga á mótinu. Báðar unnu þær sína bardaga og komust áfram. Á laugardeginum vann Kara sinn bardaga í undanúrslitum en Hildur þurfti að sætta sig við tap gegn eistneskri stelpu sem endaði á að vinna flokkinn. Kara Valgarðsdóttir og Margrét Guðrún kepptu einnig á laugardeginum en þær töpuðu báðar í undanúrslitum.
Á sunnudeginum keppti Kara í úrslitum í -60 kg flokki og vann á stigum. Þetta var þriðji bardagi hennar á jafn mörgum dögum og stóð hún uppi sem sigurvegari í flokknum.
Kristín Sif keppti einnig í úrslitum á sunnudeginum en hún fór beint í úrslit í sínum flokki. Kristín tapaði og hreppti því silfrið.
Flottur árangur hjá íslensku stelpunum á sterku móti.
Mynd: Ásgeir Marteinsson/Mjölnir
