Kolbeinn Kristinsson berst sinn tíunda atvinnubardaga í boxi í kvöld. Bardaginn fer fram í Finnlandi og mætir Kolbeinn heimamanninum Gennadi Mentsikainen.
Kolbeinn Kristinsson (9-0) hefur glímt við meiðsli að undanförnu og ekki keppt síðan í apríl 2017. Það verður því kærkomið að sjá hann aftur í hringnum í kvöld.
Boxkvöldið hefst kl. 16:05 á íslenskum tíma en Kolbeinn á að ganga í hringinn um 18:30. Kolbeinn er mikill stuðningsmaður Liverpool en Liverpool mætir einmitt Real Madrid í kvöld í úrslitaleik Meistaradeildarinnar. Leikurinn hefst 15 mínútum áður en Kolbeinn gengur í hringinn og ætlar Kolbeinn að rota Finnann snemma svo hann nái leiknum!
Bardagarnir verða í beinni útsendingu hér eftir því sem næst verður komist. Kolbeinn verður í næstsíðasta bardaga kvöldsins og er þetta sex lotu bardagi.
