Sunna Rannveig Davíðsdóttir berst sinn annan bardaga í Invicta nú á laugardaginn. Sunna mætir Mallory Martin og er meira en tilbúin í bardagann.
Sunna Rannveig barðist sinn fyrsta bardaga í Invicta í september þegar hún sigraði Ashley Greenway eftir dómaraákvörðun. Rétt eins og fyrsti bardaginn hennar í Invicta fer bardagnn fram í Kansas.
Mallory Martin er 1-0 sem atvinnumaður líkt og Sunna en þetta verður fyrsti bardaginn hennar í Invicta bardagasamtökunum.
Sunna var mjög ánægð með frumraun sína í Invicta og segir að bardagasamtökin hafi hugsað vel um sig. Þetta var mikið ævintýri síðast en nú er komið að því að endurtaka leikinn og ná í næsta sigur.
„Ég sé fyrir mér bardaginn fari þannig að ég standi uppi sem sigurvegari. Ég er búin að vera í rosalega góðum undirbúningi, ég er vel stödd andlega og ég trúi því að ég hafi allt til þess að sigra,“ segir Sunna um komandi bardaga.
Bardaginn verður sýndur á Stöð 2 Sport en bein útsending frá bardagakvöldinu hefst á miðnætti á laugardaginn (aðfaranótt sunnudags).
