Luke Rockhold mun mæta Chris Weidman í fyrstu titilvörn sinni á UFC 199 í júní. Þetta staðfesti Dana White, forseti UFC, í gær.
Luke Rockhold varð nýr millivigtarmeistari UFC eftir að hann sigraði Chris Weidman með tæknilegu rothöggi á UFC 194 í desember. Bardaginn var nokkuð jafn framan af þar til Rockhold komst ofan á í 3. lotu og lét höggin dynja á þáverandi meistara. Rockhold tókst svo að klára Weidman í 4. lotu og átti frábæra frammistöðu.
Weidman varði beltið sitt þrívegis eftir að hann vann titilinn af Anderson Silva árið 2013. Hann mun nú freista þess að ná titlinum aftur í júní.
Upphaflega var talið að Yoel Romero myndi fá næsta titilbardaga en eftir að hann féll á lyfjaprófi ríkti nokkur óvissa um hver fengi næsta titilbardaga í millivigtinni. Eftir að Jacare Souza var bókaður gegn Vitor Belfort beindust öll spjót að Weidman. Weidman fær nú tækifæri á að hefna fyrir sitt fyrsta tap á ferlinum og ná beltinu sínu aftur.
UFC 199 fer fram í júní en UFC hefur hvorki staðfest nákvæma dagsetningu né staðsetningu.
.@katienolan with another scoop! @LukeRockhold will rematch @ChrisWeidmanUFC in June #GTLive https://t.co/FPRrmAP9og
— Garbage Time (@GarbageTime) February 3, 2016
