Tveir Íslendingar börðust á Vison MMA Combat bardagakvöldinu fyrr í kvöld. Strákarnir koma heim með tvo sigra en bardagakvöldið fór fram í Carlisle.
Strákarnir koma báðir frá Reykjavík MMA en Aron Leó Jóhannsson var fyrstur. Aron mætti Norðmanninum Kristoffer Langerud (0-1 fyrir bardagann) en þetta var fyrsti bardagi Arons. Aron sigraði eftir dómaraákvörðun í jöfnum og spennandi bardaga.
Magnús ‘Loki’ Ingvarsson (2-0 fyrir bardagann) mætti Dan Ballard (0-1 fyrir bardagann) í sínum þriðja atvinnubardaga. Magnús var í nákvæmlega engum vandræðum með Ballard. Magnús tók bakið á Ballard og pipraði hann með nokkrum höggum áður en hann læsti „rear naked choke“ hengingunni. Ballard kom inn í bardagann með nokkurra daga fyrirvara eftir að upprunalegi andstæðingur Magnúsar hafði dottið út. Magnús er núna 3-0 sem atvinnumaður eftir sigurinn en bardagann má sjá hér að neðan.
Mel Már Halidesson úr Iceland Combat Arts átti að keppa í kvöld en þurfti að draga sig úr bardaganum vegna hnémeiðsla sem hann varð fyrir í vikunni.
Á Ambition Fight Series eru síðan fjórir keppendur frá Reykjavík MMA og Mjölni en nánar verður fjallað um þá bardaga um leið og þeir klárast.
