Ómar Yamak tapaði í ofurglímunni sinni í Hollandi í dag. Glíman fór fram á FUJI BJJ Challenge mótinu í Groningen.
Ómar mætti Svíanum Emad Omran í ofurglímu á skemmtilegu móti. Á FUJI BJJ Challenge mótinu var keppnismönnum með blá og fjólublá belti boðið að keppa en keppt var í þremur þyngdarflokkum. Emad átti að keppa en skömmu fyrir mótið var hann gráðaður í brúnt belti. Hann var því ekki lengur gjaldgengur á mótinu en skipuleggjendur mótsins settu þess í stað saman þessa ofurglímu við Ómar Yamak.
Emad byrjaði á því að leggjast á bakið (guardpull) og sópaði Ómari. Emad fékk fyrir vikið tvö stig en Ómar komst aftur ofan á. Þar var Emad eldsnöggur að læsa „triangle“ hengingu og þurfti Ómar að tappa út eftir 1:26 af glímunni.
Í stuttu viðtali eftir glímuna kvaðst Ómar vera vonsvikinn en hrósaði Emad fyrir góða frammistöðu. Glímuna má sjá hér að neðan en hún byrjar eftir 2:32:00.
