Haustdagskrá Neil Magny hefur örlítið breyst. Magny átti að berjast í Brasilíu í september en mun þess í stað mæta Santiago Ponzinibbio í Argentínu í nóvember.
Neil Magny átti að mæta Alex Oliveira á UFC bardagakvöldinu í Sao Paulo þann 22. september. Nú hefur Magny verið færður yfir landamærin og mætir þess í stað Ponzinibbio í Argentínu. Heiðursmaðurinn Magny bað Oliveira afsökunar á Instagram.
UFC heimsækir Argentínu í fyrsta sinn þann 17. nóvember. Argentínumaðurinn Santiago Ponzinibbio verður þá í aðalbardaga kvöldsins en UFC hefur leitað að andstæðingi fyrir hann. Ponzinibbio vildi fá Rafael dos Anjos en sá síðarnefndi vildi ekki berjast utan Bandaríkjanna þar sem hann á von á sínu þriðja barni. UFC ákvað því að færa Magny og er Ponzinibbio því kominn með topp andstæðing á heimavelli.
Magny barðist síðast í Liverpool í maí þegar hann kláraði Craig White í 1. lotu en White kom í stað Gunnars sem meiddist á hné. Ponzinibbio átti að vera í aðalbardaga kvöldsins í fyrstu heimsókn UFC til Síle í maí en nokkrum vikum fyrir bardagann meiddist hann á þumalfingri og kom Demian Maia í hans stað. Síðast sigraði Argentínumaðurinn Mike Perry í desember.
