UFC er með lítið bardagakvöld í Greenville í kvöld þar sem skemmtilegur bardagi í fjaðurvigtinni fer fram. Hér eru nokkrar ástæður til að horfa á bardagakvöldið í kvöld.
Ávísun á fjör
Chan Sung Jung eða ‘The Korean Zombie’ eins og hann er oftast kallaður hefur lítið barist undanfarin ár. Jung barðist ekkert í fjögur ár vegna meiðsla og tveggja ára herskyldu í Suður-Kóreu. Síðast sáum við hann tapa fyrir Yair Rodriguez með rothöggi á síðustu sekúndunni í fimm lotu bardaga. Hann er þó alltaf skemmtilegur og alltaf í skemmtilegum bardögum. Í kvöld mætir hann Renato Moicano sem er ekki síður skemmtilegur bardagamaður svo þetta ætti að verða fjörugur bardagi.
Mikilvægur bardagi í fluguvigt kvenna
Þær Andrea Lee og Montana De La Rosa mætast í mikilvægum bardaga í fluguvigt kvenna. Meistarinn Valentina Shevchenko virðist hafa mikla yfirburði í fluguvigtinni og mætir Liz Carmouche í næstu titilvörn sinni. Lee eða De La Rosa gæti fengið næsta titilbardaga með sigri. Báðar eru þær ósigraðar í UFC og munu báðar mæta hungraðar til leiks enda mikið í húfi. Það ætti að gefa okkur góðan bardaga.
Stúfurinn í millivigt
Deron Winn berst sinn fyrsta bardaga í UFC í kvöld þegar hann tekur á móti Eric Spicely í millivigt. Winn er bara 5-0 í MMA og er með frábæra ferilskrá í ólympískri glímu. Það sem vekur helst athygli við Winn er að hann er aðeins 165 cm á hæð. Hann mun alltaf vera minni bardagamaðurinn en andstæðingur hans í kvöld er 188 cm á hæð. Winn æfir hjá AKA og er í góðum tengslum við Daniel Cormier.
Endurkoma Matt Wiman
Matt Wiman mætir Luis ‘Violent Bob Ross’ Pena í kvöld. Þetta verður fyrsti bardagi Wiman í fimm ár og áhugavert að sjá hvernig hann kemur til leiks. Þetta verður 16. bardagi Wiman í UFC en á sama tíma er Pena aðeins 6-1 sem atvinnumaður í MMA. Það gæti reynst erfitt fyrir Wiman að koma til baka eftir fimm ára fjarveru gegn ungum og ferskum andstæðingi.
Fyrsti bardagi kvöldsins hefst kl. 20:00 en aðalhluti bardagakvöldsins kl. 23:00.
