UFC er að vinna í að setja saman stóru bardagana fyrir sumarið. Einn af bardögunum sem UFC vill setja upp er bardagi Conor McGregor og Justin Gaethje.
Conor McGregor vill berjast þrisvar á þessu ári en hann sigraði Donald Cerrone í janúar. Hans næsti bardagi hefur ekki verið ákveðinn en orðrómurinn er sá að Conor mæti Justin Gaethje í sumar.
Dan Hooker sigraði Paul Felder á UFC bardagakvöldinu í Nýja-Sjálandi um síðustu helgi. Eftir bardagann óskaði Hooker eftir bardaga við Justin Gaethje.
Ariel Helwani sagði hins vegar í gær að UFC sé að reyna að setja saman bardaga Conor McGregor og Justin Gaethje. Bardaginn færi fram í sumar en samningar eru skammt á veg komnir og margt getur breyst áður en samningar nást. Nate Diaz kemur einnig til greina fyrir Conor.
Justin Gaethje svaraði ekki áskorun Dan Hooker um helgina en Hooker sagði í gær að ef Gaethje væri upptekinn væri hann til í að mæta Dustin Poirier.
UFC er yfirleitt með fjögur stór bardagakvöld yfir sumarmánuðina (júní, tvö í júlí og svo í ágúst). UFC fer til Ástralíu í júní en Conor myndi að öllum líkindum berjast í júlí eða ágúst.
Ariel ræðir stöðuna í léttvigt eftir um það bil 6 mínútur.
