Rory MacDonald er sagður vera á leið í Bellator. Heimildir MMA Fighting herma að MacDonald sé nálægt því að skrifa undir og það sé í raun bara formsatriði.
Fyrr í dag sáum við að Rory MacDonald var ekki lengur á topp 15 á styrkleikalista UFC í veltivigtinni. MacDonald var í 3. sæti listans og var í kjölfarið mikil breyting á listanum.
MacDonald hefur fengið gott samningsboð frá Bellator og kaus UFC að jafna það ekki í gærkvöldi. Samningur Rory MacDonald við UFC lauk eftir bardaga hans við Stephen Thompson en MacDonald vildi kanna virði sitt á opnum markaði.
MacDonald á enn eftir að skrifa undir samninginn við Bellator en það er sagt vera einungis tímaspursmál.
Þetta eru stórar fréttir enda er MacDonald án efa einn besti veltivigtarmaður heims. MacDonald var 9-4 í UFC og verður þetta góð viðbót við veltivigt Bellator.
