Rousimar Palhares mætir Craig Jones á Kasai Pro 3 glímukvöldinu á morgun. Palhares var alltof þungur í vigtuninni í dag og mun glíman fara fram í opnum flokki.
Upphaflega átti glíma Craig Jones og Palhares að vera í 185 pundum (83,9 kg). Mótshaldarar breyttu þyngdinni þegar Palhares tjáði þeim að hann myndi ekki ná vigt og áttu því báðir keppendur að vera 200 pund (90,9 kg) í vigtuninni í dag (föstudag). Þyngdartakmörkum var því hent út um gluggann og verður glíman í opnum flokki.
Palhares var 218 pund (99,1 kg) í vigtuninni fyrir glímuna í dag en Jones 204,6 pund (93 kg). Nýlega vakti ofangreind mynd af Palhares mikla athygli þar sem hann var einfaldlega hrikalega stór. Einhverjir samskiptaörðugleikar virðast hafa átt sér stað á milli mótshaldara og Palhares en Palhares taldi að engin þyngdartakmörk væru fyrir glímuna. Jones samþykkti svo í dag að hafa glímuna í opnum flokki.
Palhares barðist áður fyrr í 77 kg veltivigt í MMA en hefur sagt að hann ætli sér aftur upp millivigt fyrir sinn næsta MMA bardaga.
