Santiago Ponzinibbio var að vonum brattur eftir sigurinn á Gunnari í Glasgow. Þetta var hans fimmti sigur í röð og mun hann klífa upp styrkleikalistann eftir þetta.
Argentínumaðurinn kláraði Gunnar með höggum eftir 1:24 í 1. lotu. Þetta er í fyrsta sinn sem Gunnar er kláraður á ferlinum.
„Ég æfði mjög vel í langan tíma og vissi að góð úrslit kæmu. Ég ber mikla virðingu fyrir Gunnari og vissi að hann myndi koma til leiks tilbúinn í stríð. Að vinna sterkan andstæðing eins og hann í fyrstu lotu, á innan við tveimur mínútum, kom mér á óvart. Þetta eru úrslit fyrir þá sem höfðu ekki trú á mér,“ sagði Ponzinibbio eftir bardagann.
Ponzinibbio kýldi Gunnar niður með beinni hægri og bakkaði Gunnar að búrinu vankaður. Þar var Gunnar felldur með hárbeittri stungu.
„Ímyndið ykkur hvað hægri höndin mín getur gert ef stungan mín getur gert þetta? Ég er tilbúinn að berjast við alla í flokknum en væri til í Neil Magny eða Carlos Condit næst. Mig langar að sýna að ég geti orðið heimsmeistari.“
