Stefán Þórarinsson fékk silfur á Evrópumótinu í brasilísku jiu-jitsu sem fram fór um síðustu helgi. Stefán keppti í unglingaflokki en hann er búsettur í Svíþjóð.
Stefán keppti í -64 kg flokki unglinga í blábeltingaflokki. Stefán fékk tvær glímur á mótinu en hann æfir hjá KFUM Fightzone í Malmö.
Stefán hefur æft BJJ í rúm tvö ár en aldrei æft hér á Íslandi fyrir utan örfáa daga í Mjölni er hann var í fríi hér á landi.
Þetta er ekki í fyrsta sinn sem Stefán vinnur til verðlauna á stóru móti en hann vann sinn flokk á Heimsmeistaramótinu í sumar en þá keppti hann í unglingaflokki hvítbeltinga. Þá vann hann sína flokka á Rome Open og Danish Open í fyrra.
