Vigtunin fyrir UFC 226 gekk vel í dag. Allir bardagamenn nema einn náðu vigt en það sem vakti mestu athygli var þyngd Daniel Cormier.
UFC 226 fer fram á morgun þar sem þeir Stipe Miocic og Daniel Cormier mætast um þungavigtartitilinn. Léttþungavigtarmeistarinn (93 kg flokkur) Daniel Cormier var hvorki meira né minna en 246 pund (111,8 kg) á meðan þungavigtarmeistarinn Miocic var 242,5 pund (110,2 kg).
Derrick Lewis var síðan rétt undir þungavigtarmörkunum eða 264,5 pund (120,2 kg) en Francis Ngannou 253 pund (115 kg). Ekki má vera meira en 266 pund í þungavigt.
Michael Chiesa var síðan 157,5 pund (71,6 kg) fyrir bardaga sinn í léttvigt gegn Anthony Pettis og þar af leiðandi 1,5 pundi of þungur. Chiesa lýsti því svo yfir að hann ætli sér upp í veltivigt eftir bardagann gegn Pettis.
