Bardagaeyja UFC verður að veruleika 18. júlí. UFC hefur hafið leit að bardögum á eyjunni en ekki er vitað hvar eyjan er.
UFC hefur leigt einkaeyju á ónefndum stað þar sem bardagar fara fram. Hugmyndin er að þar fari bardagar fram hjá bardagamönnum sem geta ekki ferðast til Bandaríkjanna.
Fyrsti bardaginn sem virðist vera staðfestur á kvöldið er viðureign Kelvin Gastelum og Jack Hermansson. Hermansson æfir í Noregi og þarf því að ferðast þaðan til bardagaeyjunnar.
Báðir eru að koma af tapi en Gastelum hefur tapað tveimur bardögum í röð. Gastelum var í einum besta bardaga ársins 2019 þegar hann tapaði fyrir Israel Adesanya og tapaði síðan fyrir Darren Till.
Jack Hermansson var á frábæru skriði þar til hann tapaði fyrir Jared Cannonier í Kaupmannahöfn. Hermansson átti að mæta Chris Weidman í maí en bardaginn féll niður vegna kórónaveirunnar.
Þetta er fyrsti bardaginn sem tilkynntur er á bardagakvöldið á eyjunni þann 18. júlí.
