![](https://i0.wp.com/mmafrettir.is/wp-content/uploads/2022/03/2022_03_05_0gc_Kleki.png?resize=696%2C402&ssl=1)
Gunnar Nelson átti að mæta Claudio Silva á UFC bardagakvöldinu í London þann 19. mars. Claudio Silva er hins vegar meiddur og getur ekki barist.
Gunnar Nelson mætir aftur í búrið eftir rúmlega tveggja ára fjarveru núna í mars. Upprunualegi andstæðingur hans hefur þó þurft að draga sig úr bardaganum vegna meiðsla.
Claudio Silva er meiddur á hné og tilkynnti UFC Gunnari fréttirnar fyrr í vikunni. UFC ætlar að finna nýjan andstæðing fyrir Gunnar og samkvæmt heimildum MMA Frétta gengur sú leit vel. Þeir Íslendingar sem verða í O2 Arena í mars þurfa því ekki að hafa áhyggjur þar sem Gunnar mun að öllum líkdindum fá andstæðing þetta kvöld.
Hver andstæðingurinn verður mun koma í ljós í vikunni en í dag eru akkúrat tvær vikur í bardagakvöldið. Sá sem kemur inn fær því ekki langan tíma til að undirbúa sig en Gunnar mun að sama skapi ekki fá langan tíma til að læra á nýjan andstæðing.
Bardagakvöldið þann 19. mars verður í beinni á Viaplay.