Dominick Cruz mun verja bantamvigtartitil sinn gegn Cody Garbrandt. Bardaginn fer fram á UFC 207 í desember – sama kvöld og Ronda Rousey snýr aftur.
Orðrómar um bardagann hafa verið á kreiki í um það bil viku en var staðfestur í gærkvöldi. Það verður því heljarinnar veisla þann 30. desember þegar UFC 207 fer fram en báðir bantamvigtarmeistararnir verða í eldlínunni – Amanda Nunes og Dominick Cruz.
Cody Garbrandt hefur farið á kostum síðan hann kom í UFC í fyrra. Garbrandt hefur klárað fjóra af fimm bardögum sínum með rothöggi og er ósigraður í tíu MMA bardögum. 2016 hefur verið frábært ár hjá honum en allir þrír bardagar hans hafa klárast í 1. lotu. Margir aðdáendur vildu því sjá hann fá tækifæri gegn meistaranum Dominick Cruz.
Cruz hefur sömuleiðis átt gott ár en hann byrjaði árið á að ná gamla beltinu sínu aftur frá T.J. Dillashaw. Hann varði svo titilinn í júní gegn Urijah Faber, liðsfélaga og einn af þjálfurum Cody Garbrandt.
Fyrrum meistarinn T.J. Dillashaw er væntanlega ósáttur með þessar fréttir en hann hefur ítrekað óskað eftir að fá annan bardaga gegn Cruz. Fyrri bardaginn var afar jafn og töldu margir að Dillashaw hefði átt skilið að vinna. Það verður því einhver bið á endurati þeirra og spurning hvað Dillashaw gerir næst.
Dillashaw fékk aðeins 50.000 dollara fyrir sigur sinn á Raphael Assuncao á UFC 200 og verða þessar fréttir ekki til þess að gera hann hamingjusamari með núverandi stöðu sína.
