Dustin Poirier berst gegn Michael Johnson á laugardaginn. Poirier var í viðtali í UFC Unfiltered hlaðvarpinu á dögunum og kom meðal annars inn á bardaga sinn gegn Conor McGregor.
„Ég er með 33 bardaga að baki, kannski hitti hann svona vel í mig en árangur hans talar sínu máli, hann er meistarinn. En hann er með þyngstu hendur sem ég hef fundið fyrir,“ sagði Dustin Poirier um bardagann gegn Conor McGregor á sínum tíma.
Poirier og McGregor mættust á UFC 178 í september 2014. McGregor kláraði Poirier með tæknilegu rothöggi eftir 1:46 í 1. lotu.
Það reyndist vera síðasti bardaginn hans í bili í fjaðurvigtinni en síðan þá hefur Poirier barist í léttvigt. Þar hefur honum vegnað afar vel og unnið alla fjóra bardaga sína og þar af þrjá með rothöggi.
Bardagi Dustin Poirier og Michael Johnson er aðalbardaginn á UFC bardagakvöldinu í Hidalgo, Texas, á laugardaginn. Hægt er að hlusta á bút úr viðtalinu hér að neðan en þar kemur hann einnig inn á sinn síðasta bardaga gegn Bobby Green, komandi bardaga gegn Johnson og nýja föðurhlutverkið.
https://www.youtube.com/watch?v=JMku9EXGZKo&feature=youtu.be
