Einn af framkvæmdastjórum Reebok keðjunnar er á leið til Íslands. Tilgangur heimsóknarinnar er að ræða mögulegt samstarf Mjölnis, Gunnars Nelson og Reebok.
Reebok er styrktaraðili UFC en sjö ára samningur fataframleiðandans tók í gildi síðasta sumar. Allir bardagamenn UFC þurfa að klæðast fatnaði Reebok er þeir berjast.
Reebok greiðir bardagamönnum fyrir hvern bardaga og fer eftir fjölda bardaga í UFC hve há upphæðin er. Upphæðirnar eru frá 2.500 dollurum til 20.000 dollara en meistarar fá meira.
Reebok er þó með nokkra bardagamenn á sínum snærum sem eru sérstakir „Reebok-íþróttamenn“ og eru þeir með sér samning við Reebok. Þetta eru stjörnur eins og Ronda Rousey, Conor McGregor, Anthony Pettis, Johny Hendricks, Joanna Jedrzejczyk og fleiri. Mögulega er Gunnar að fara að fá sér samning.
Gunnar Nelson hefur barist átta bardaga í UFC og fær því 5.000 dollara frá Reebok fyrir hvern bardaga. Ef Gunnar fær sér samning við Reebok mun hann fá hærri upphæð fyrir hvern bardaga og eflaust vera í alls kins kynningarefni fyrir Reebok.
Audi Attar, umboðsmaður Gunnars, mun einnig koma til landsins.
