Fyrsta titilvörn þungavigtarmeistarans Fabricio Werdum verður gegn fyrrum meistaranum Cain Velasquez. Werdum tók beltið af Velasquez með sannfærandi hætti fyrr á árinu og munu þeir því mætast aftur innan skamms.
Frá þessu greindi Ariel Helwani í þættinum UFC Tonight í gærkvöldi og vitnaði í Dana White, forseta UFC. Ekki hefur verið ákveðið hvar eða hvenær bardaginn fari fram.
Fabricio Werdum og Cain Velasquez áttu fyrst að mætast á UFC 180 í Mexíkóborg en þremur vikum fyrir bardagann meiddist Velasquez. UFC setti saman bardaga milli Werdum og Mark Hunt um svo kallaðan bráðabirgðartitil (e. interim champion). Þar fór Werdum með sigur af hólmi.
Beltin voru svo sameinuð þegar Werdum og Velasquez mættust á UFC 188 í júní í Mexíkóborg. Þar sigraði Werdum með uppgjafartaki í 2. lotu og varð þar með óumdeilanlegur þungavigtarmeistari UFC. Fyrsta titilvörn hans verður því gegn manninum sem hélt beltinu í þrjú ár – Cain Velasquez.
Enn einu sinni mætir Cain Velasquez andstæðingi sem hann hefur mætt áður. Þetta verður sjöundi bardaginn hans á síðustu fjórum árum en á þessum árum hefur hann aðeins mætt þremur mönnum, Junior dos Santos (þrisvar), Antonio Silva (tvisvar) og mætir nú Werdum í annað sinn.
