Georges St. Pierre býst ekki við að verja millivigtartitil sinn. Nýjustu fregnir herma að Robert Whittaker mæti Luke Rockhold í febrúar um millivigtartitilinn.
Georges St. Pierre (GSP) varð millivigtarmeistari UFC með sigri á Michael Bisping í nóvember. GSP vildi ekki lofa því hvort hann myndi verja beltið eða ekki og er enn ekki viss hvort hann geri það. GSP hefur lengst af barist í veltivigt og var bardaginn gegn Bisping hans fyrsti í millivigt.
„Við munum ræða um það en ég er ekki svo viss um að ég keppi í 185 pundum ef ég keppi aftur. Ég held ekki,“ sagði GSP við TSN í gær.
GSP vildi þyngja sig mikið til að berjast í millivigt og segir að það hafi verið erfitt. Hann glímir nú við ristilbólgu og er því fjarri góðu gamni þessa dagana.
Ariel Helwani greindi frá því í gær að UFC ætli sér að láta þá Robert Whittaker og Luke Rockhold berjast á UFC 221 í febrúar. Bardagakvöldið fer fram í Ástralíu og verður Whittaker því á heimavelli.
Preliminary talks are underway to book Robert Whittaker vs. Luke Rockhold for UFC 221 in Perth, Western Australia, sources say. Not 100% just yet, though.
— Ariel Helwani (@arielhelwani) December 6, 2017
Whittaker er bráðabirgðarmeistarinn í millivigtinni eftir sigur á Yoel Romero í sumar. Hugsanlega gæti það farið svo að GSP láti beltið af hendi á næstunni og verður þá bardagi Whittaker og Rockhold um alvöru beltið.
