Loksins er Gunnar Nelson kominn með andstæðing. Draumaviðureign Gunnars gegn Demian Maia verður að veruleika þann 12. desember á UFC 194!
Bardaginn verður að öllum líkindum á aðalhluta bardagakvöldsins í desember. Þeir Conor McGregor og Jose Aldo berjast í aðalbardaganum á UFC 194 og þá munu þeir Chris Weidman og Luke Rockhold berjast um millivigtartitilinn sama kvöld.
Það stefnir allt í frábært bardagakvöld líkt og á UFC 189. Demian Maia er einn besti gólfglímumaður sem stigið hefur fæti inn í UFC búrið og margfaldur heimsmeistari í brasilísku jiu-jitsu. Demian Maia er einn af fáum bardagamönnum í heiminum sem stenst Gunnari snúninginn í gólfinu og er jafnvel betri glímumaður.
Maia hefur sigrað þrjá bardaga í röð síðan hann tapaði fyrir Rory MacDonald í fyrra. Þarna mætast tveir af bestu glímumönnum veltivigtarinnar og verður áhugavert að sjá hvernig bardaginn mun spilast.
Við munum fara nánar yfir feril Demian Maia síðar í dag.
