MMA Fréttir hefur heimildir fyrir því að Gunnar Nelson sé meiddur og hafi því miður þurft að draga sig úr bardaga sínum gegn Neil Magny í maí.
Gunnar Nelson átti að mæta Neil Magny á UFC bardagakvöldinu í Liverpool í maí. Um stóran bardaga hefði verið að ræða fyrir Gunnar enda er Neil Magny á topp 10 styrkleikalistanum í veltivigtinni.
Undirbúningur Gunnars fyrir bardagann fór vel af stað og komu fjölmargir bardagamenn hingað til lands til að aðstoða hann. Í undirbúningnum fyrir bardagann hefur hann því miður meiðst og neyðist til að hætta við bardagann. Gunnar þarf að fara í aðgerð og þarf að taka sér nokkurra vikna hlé frá æfingum eftir aðgerðina. Reiknað er með að hann hefji æfingar aftur um mitt sumar ef allt gengur að óskum.
Þetta er í þriðja sinn sem Gunnar hefur þurft að hætta við bardaga vegna meiðsla. Fyrsta tilvikið var fyrir bardaga gegn Mike Pyle árið 2013 og annað tilvikið fyrir bardaga hans gegn Dong Hyun Kim árið 2016.
Neil Magny er þar með án andstæðings fyrir Liverpool og spurning hvort hann fái nýjan andstæðing í Liverpool eða verði tekinn af bardagakvöldinu.
