Inga Birna Ársælsdóttir fékk bronsverðlaun í opnum flokki í brasilísku jiu-jitsu á Copenhagen Open sem fram fór í gær.
Inga Birna keppti fyrir hönd Mjölnis en hún var bara ein skráð í -64 kg flokk fjólublábeltinga í galla. Hún var því sjálfkrafa skráð í opinn flokk fjólublábeltinga þar sem hún fékk tvær glímur.
Fyrri glímuna vann hún á stigum en Inga hafði tapað fyrir sama mótherja á Nordic Open í vor. Seinni glímunni tapaði hún og fékk að launum bronsverðlaun.
Inga Birna þurfti svo að sætta sig við tvö töp gegn sömu stelpunni í nogi (án galla). Fyrra tapið var í þeirra flokki og það seinna í opna flokkinum.
