John Kavanagh segir að Conor McGregor sé enn að berjast einfaldlega vegna ánægjunnar sem hann fær af því. Conor er með nokkra valkosti fyrir höndum og er spurning hvað sé næst fyrir hann.
Conor McGregor hefur verið orðaður við bardaga við Donald Cerrone. Bardagar gegn Jose Aldo og Anderson Silva hafa einnig verið nefndir til sögunnar en bardagi gegn Cerrone virðist lang líklegastur.
Kavanagh hefur enga sérstaka skoðun á hvað hann vill sjá fyrir Conor. Það sem heillar Conor mest er það sem Kavanagh er spenntastur fyrir. „Á þessum tímapunkti er það bardaginn sem heillar Conor mest [sem ég er spenntastur fyrir]. Hann er með heiminn að fótum sér, hann er bara að berjast þar sem honum finnst það gaman sem er besta ástæðan til að berjast. Það verður að vera sá bardagi sem kemur honum af stað á morgnana,“ segir Kavanagh.
