Jólamót Sleipnis fyrir 30 ára og eldri fer fram í fyrsta sinn á laugardaginn. Keppt er í brasilísku jiu-jitsu og fer mótið fram í Reykjanesbæ.
Jólamótið er aðeins fyrir þá sem eru 30 ára og eldri. Jötnar, þursar og þursameyjar eru sérstaklega boðuð á mótið og allir 30+ með brotnar sálir eins og fram kemur á viðburðinum.
Ekki verður keppt í belta- eða þyngdarflokkum heldur einungis aldursflokkum (30-39 ára, 40-49 ára og 50+). Keppt er í galla og er einungis hægt að vinna á uppgjafartaki. Veitt verða sérstök verðlaun fyrir sigra í hverjum flokk fyrir sig auk bestu tilþrifa, besta uppgjafartakið, háttvirtisverðlaun fyrir góðan drengskap og sigra í opnum flokkum.
Mótið hefst kl. 11 og fer fram hjá Sleipni í Bardagahöllinni, Smiðjuvöllum 5.
